Titi Qaqa quta manqha yänakata yatxatapxani

Arqueología Subacuática en el Lago Titicaca Foto: CTB-CIBA

Niyawa 2016 marana “Proyecto del Lago” sutini mä jacha amtawixa qalltawayi, quta thiya jak’ankirinakaru yanapt’añataki. Pasiri 27 willka kuti phaxsina, Copacabana markana Cooperación Técnica Belga (CTB) ukhamaraki Ministerio de Culturas y Turismo (MdCyT) ukankirinakawa, 13 Alcaldia ukankirinakampi, mä tantachawi Hotel Gloria taypina tantachasiwäpxi.

Kunjamsa aka  jach’a amtawixa sartaski ukanaka qhananchapxi, turismo ukhamaraki arqueología irnaqañawa amtataraki, arqueología ukatuqita yatxatañatakixa tata Christophe Delaere jupawa purinitayna, khaysa Bélgica Markata, boliviano arqueólogo jupanakaru, kunjamasa uma manqhana irnaqañaxa, ukxata yatichiri.

Ukhamarakiwa turismo ukatuqita ch’amanchaña amtapxatayna, quta thiyana irnaqirinakaru amuyt’ayañataki, amparampi yänaka luratanaka wakicht’ayapxi, ukhamaraki uta qurpachaña mayt’irinakaru.

Alcalde jupanakaxa purinipxataynawa pachpa Copacabana markata, Tiquina, Puerto Perez, Guaqui, Pucarani, Ancoraimes, Batallas, Puerto Acosta, Santiago de Huata ukhamaraki Tiwanaku markata purinipxatayna. Walja jilata kullakanakarakiwa uksaru sarantapxatayna. Escoma, Tito Yupanqui ukxaruxa Puerto Carabuco ukankirinakaxa janiwa sarapxkataynati.

Aka Proyecto del Lago jach’a amtawixa kimsa marawa irnaqatarakïni, sasinawa yatiyanipxaraki CTB-MdCyT ukatuquita yatiyanipxaraki. 

Qillqiri: Franz G. Laime P. - Copacabana/Bolivia