Pä lamara jikisiyiri makina thakhi

Pirwa markana jilïripampi ukhamaraki Bolivia markana jilïripampiwa aka urunakaxa Sucre markana jikisiwäpxatayna. Jupanakaxa taqpacha ministro jupanakampi chikawa jikisiwayapxatayna. Ukan walja amtanakaruwa puriwayapxatayna. Wali amtkaya ukhamaraki munkaya ukaxa tren bioceánico sapxkixa ukawa.

http://images.hoy.com

Uka pä jach’a lamara jikisiyiri makina thakhixa kimsa yach’a markanaka jikisiyani, siwa. Brasil, Bolivia ukhamaraki Perú. Puerto de Santos uka Brasil markata qalltanisa Puerto de Il,o uka Perú markakamawa purini, siwa.

Perú markana Pedro Pablo Kucziynski jilïripampi Bolivia markana Evo Morales jilïripampi janira ministro jupanakampi parlkasa, panikiwa nayraqata jikist’asa, uka pä jach’a lamara jikisiyiri makina thakhita, parlakipt’apxatayna.

http://elcomercio.pe

Ukatxa Pirwa Presidente jupaxa: “Nayra amtanaka ukhamaraki jichha machaqa amtanaksa sartayaña munapxtha, uka corredor bioceánico uksa. Niya China markana jichhakiwa jisthxa, nayana amuyujanxa Bolivia uksa uka makina thakhixa pasañapa, janiwa uka Brasil ch’umi ch’umi muytaniñaxa walïkaspati.” Sataynawa.

http://img.europapress.net

Uka pä jach’a lamara jikisiyiri makina thakhi luratäñapatakixa, China markampi Alemania markampiwa qullqinakxa apnuqani, siwa. Ukhamaxa uka amtaxa phuqhaspachäniwa. Ukhamaraki markanakasatakixa irnaqañasa walirakiwa utjpachani. (Qillqiwa Félix Layme Pairumani)