Wasitata ARU PIRWA ukhamaraki ARU KAMANA apsupxani

Khaya 2002 maranakawa Unicef, uka uphisina irnaqirinakaxa pä panka, wawanakaru yatirichinakataki, apsuwayapxäna. Uka pankanakaxa akïrinakänwa: mayaxa ARU PIRWA, ukaxa aymara arunaka aymaratkamaki qillqt'a, 2.600 arunïnwa, mayaraki Gramática Aymara. Jichhaxa wasitata uka pä panka, wawanakaru yatirinakataki apsuwayapxani. Ukhama papila qillqt'awa ukhamaraki rixuntt'atawa utji. Ukaxa, jichhaxa, ARU PIRWAxa, 4.000 arunakanïniwa, siwa. Ukata uka Gramática Aymara ukaraki, niya mä ukhampi jach'aptayatäniwa, ukhamawa amtaxa.

Ukhama Unicef uksankirinakampi, tata Adan Pari, ukhamaraki tata Celestino Choque Villca, tata David Aruquipa. Maysatxa tata Felix Layme Pairumani qillqirimpixa amtawayapxi. Uka pankanakaxa jichhakamaxa q'ala tukusita, janiwa jikiñjamäkxänti. 10.000 pankanaksa sapa mayata, imprenta ukana, apskapxchïnxa, q'alawa tukusxatayna, yamasa gramática ukxa paya kutsa apsuwayapxchixa, ukhampachasa q'alawa tukusxatayna. Uka pankanakaxa wali thaqhatawa.
Uka pankanakaxa, uñstkäna uka pachanakaxa, yatiña utanakanaki pä aruta yatichirinakaru lakirasitayna, ukata janiwa taqpacha jaqinakata churañasa alañasa utjkänti. Jichhaxa, janirakikiwa aljañataki utjkaniti, inasa internet PDF uksata apsuñataki, lisinsya mayipxchini.

Aka pankanakaxa paypacha kimsa phaxsinaki askicht'atäñapa, ukhamawa amtaxa. Uka phaxsinakaxa akïrinakawa: llumpaqa phaxsi, sata qallta phaxsi, sata phaxsi, yasta chhijllawi mäkipatatxa imprintaru panka lurayañataki q'ala tukutäxañapawa, siwa. (CSP)

Adán Pari (kupinkiri) y Félix Layme Pairumani (Ch'iqanqiri) panka qillqiri.