Aymara aru ch'amanchirinaka

Jichha taypi sata phaxsi 8 atuqu urukipanxa, Aymara Yatichawi Ulaqa CEA tantachawinkirinakaxa Aymara Aru Kamani Jach’a Utana ILCNA irnaqirinakaru ukhamaraki aymara aru ch’amanchirinakaruwa katuqt’apxana. Uka aruskiparuxa Universidad Aymara Tupaj Katari INIBOL Aymara, Instituto de Cultura y Lengua Aymara-UNIBOL, Escuela de Gestión Pública Plurinacional, Universidad Mayor de San Simón ukhamaraki walja jach’a tantachawinach’amanchirinakawa ukankapxana.Uka aruskipañana taqituqita arunaka qhanancht’asaxa mä yanapt’iri jisk’a qutu utt’ayawayapxana. Yanapt’iri tuqunkirinakaxa aymara aru thakhincha (normalización), yatichaña (enseñanza) ukhamaraki yatxataña (investigación) amtanaka akata qhiparuxa juk’ampi ILCNA taypina taqpacha aymaramarkachirina askipataki yanapt’apxani. Uka qutunkirinakaxa nayra maranakatpacha aymaru qillqt’asawa markasaru ch’amanchaskapxana. Jichhata uksaruxa aymara aru thakhincha (gramática) aymara aru pirwa (diccionario) ukanaka aymara arutkama qillqt’asawa Bolivia markasaru jach’anchañataki katuyapxani.

CEA tantachawixa Coordinadora Nacional de CEPOs ukaru mayacht’asitawa, pasiri pataka maräkipanxa Aymara Yatichawi Ulaqa Walter Gutierrez jilatawa sumpacha wakiskiri irptata ch’amanchatänwa. Ukhamaraki, Aymara Aru Kamani Jach’a Utaxa IPELC ukaru mayacht’atarakiwa; uka taypinxa kulaka Marta Gonzáles Cochi jupawa ch’amanchaña qalltaskaraki, ukhamäpanxa jupa kullakaxa mä taykalantiwa ILCNA taypinxa mayni irnaqiri sullkawiri irnaqirinakaruxa wakiskiri thakhi uñacht’ayasaxa irpxaruñapa.

Tukt’ayañataki. IPELC ukhamaraki ILCNA tantachawinakaxa 070, 1313, 269 jakhuni Kamachina phuqhasa utt’ayatawa. Maysatuqitxa ILCNA tantachawixa RM 599/2011 uka kamachi phuqhayiritaki utt’ayatarakiwa. Arunakxata amuyt’itirinakaxa ukhama utt’ayata tantachawinakaxa España markankiri RAE ukaru uñtata arunaktuqita taqi jani walt’añanakxata wakiskiri amuyt’asa qhana yanapt’iritakiwa. Ukhamäpanxa, aymara aruxa arsktana kikpaki  qillqaña amuyt’aña qhananchañaxa janisa ch’ikhinakana amtapa amuyupakaspa ukhamakixaniwa, sasina qhananchirisa utjarakinwa.

Vitaliano Huanca Torrez

Chukiya, taypi sata, 2013

Uñaraña

ILCNA, Irpa utasaxa, janiwa mayampi aynacht’añapaki

Escuela de Gestión Pública Plurinacional ukhamaraki Instituto Plurilingüe de Estudio de Lenguas y Culturas uka paya jach’a tantachawi irpirinakapaxa, purapata aymara ukhamaraki yaqha jiwasa jaqi arunakasaru ch’amanchañatakiwa mä convenio interinstitucional taypixa pasiri maraxa purapata mä aski amtaru puriwayapxana. Ukhamäpanxa, masuru 26 urukipanxa Chukiya markana   Programa de Capacitación en Idiomas Oficiales - EGPPukhamaraki Instituto de Lengua y Cultura de la Nación Aymara ILCNA ukana irnaqrinakaxa aruskipañatakiwa jikist’awayapxana. ILCNA irpa utasaxa jichhata uksaruxa  Roman Morales jupana p’iqinchataxiwa, ukhamarusa Martha Gonzales, Eva Apasa, Esteban Quispe, Freddy jupanakana yanapt’apampi irpxarutaxarakiwa.

Uka jikist’awinxa, Bolivia markasa utjiri aski kamachinakxata aruskipt’apxana, jichhata uksaruxa kuna lurañanakampisa Ley General de Derechos y Políticas Lingüísticas kamachi phuqhañatakixa nayraqataru sarantañani, taqi ukanakxata aruskipt’awayapxana. Ukxaruxa EGPP tantachawinkiri Programa de Capacitación en Idiomas Oficiales ukankirinakaxa kunjamsa aymara aru yaticht’añamapixa sarantaskapxi ukxata qhanancht’apxana, ukata aymara aru yatirinakaru yanapt’añatakisa kunjamsa ch’amanchaskapxi taqi ukanaka yatiyapxarakina. Escuela de Gestion Publica Plurinacional ukaxaIvan Iporre Saguero jilatana p’iqinchatawa, uka taypinxa  Programa de Capacitación en Idiomas Oficiales ukaxa Vitaliano Huanca Torrez jilatana ch’amanchatarakiwa.

Jutiri urunakatakixa ILCNA jach’a tantachawisaru taqi chuyma ch’amanchañatakixa, juk’ampi aski amtanaka wakicht’ayañatakiwa jutiri phaxsixa mayampi jikisipxani.  Uka aruskipañanxa juk’ampi amtanaka phuqhañatakiwa aymara aru ukhamaraki aymara markaru ch’amanchirinakaxa amtanaka phuqhacht’apxani.

LP 27/02/2014

Qillqiri: Vitaliano Huanca

Uñaraña

Aymara Qhichwa arsuña yatiqaskapxiwa

Jichha chika uruxa Academia Diplomática Plurinacional ukana, ukhamaraki Fondo Nacional de Desarrollo Regional uka utanakanxa, aymara aruta aruskipaña ukhamaraki qhichwa aruta aruskipaña jichha marana yatiqaña tukt’äwayapxäna. Aymara aru yaticht’irixa Marianela Choque Tola ukhamaraki qhichwa aru yatichirixa Lilian Escobar Ferauddy jupanakapxanwa. Jichhata uksaruxa Cancillería ukhamaraki ADP tantachawinkirinakaxa aymara aruta qhichwa aruta aruskipaña juk’ampi yatiqañampixa nayraqataru sarantaskapxakiniwa. Ukhama sasawa ADP uka irpiri mamaxa qhanancht’awayäna.

Maysatuqitxa, Escuela de Gestión Pública Plurinacional ukhamaraki Programa de Capacitacion en Idiomas Oficiales ch’amanchiripaxa, ayamara arusa qhichwa arusa, janiwa arsuñmayatakïxiti, jani ukaxa arsuñasa, qillqañasa, qillqata uñxatt’asa arst’ayañasa thakhinïxiwa, sasina arxatt’arakïna. Maysatuqitxa, khaya FNDR ukanxa ukhamarakiwa qhichwa aru yatiqaña tukt’ayaña wakichatapanxa EGPP ukankiri irpiriparusa pachpa tantachawi irpirinakaparusa walpuni jallallt’awayapxarakïna. Kullakanaka jilatana, kawkhankañänisa aymara arusa taqi ch’amasampi irptapxañäni.

(Foto: jorgemedina.org)

Uñaraña

Aymara aruta aruskipasixañäni

Nayaxa aymara jaqjama, taqpacha wawanakaru, jaqinakaru sapxama; jichhurunaka waranqa waranqa nayra aymara jakañtuqita amuyt’apxañäni, sasina.

Ukhamaraki jumanakaxa ancha suma jiskht’asipxma, jach’a achachilanakaru, awichanakaru jupanakawa kunjamasa nayra pacha jiwasa ... jaqinakaxa wali suma utjasipxirïtayna, jani kunatsa p'inqasisa. Ukatpi, jichhüruna taqpacha jiwasanakaxa, jälla ukhama suma jilani sullkanjama sartasipxañasawa. Janiwa kuna jaqi masisaru ajlliñäkaspati.

Ukhamaraki jallällt’ata, taqi chuymajampi, aka chacha warminakaru, taqi jiwasa jaqinakaru, aka aymara qillqatanakaru. Ukhama qilqata uñjasa jiwasa jaqinakaxa k’uchisipxaniwa. Janiwa, qawqha jaqinakasa, aymara qillqaña yatipxkiti. 

Jiwasati qillqaña katjañäni ukjaxa, kunjamänsa nayra pacha achahilanakasaxa, kunjamsa markasa suma apnaqapxirïtayna, ukhamaraki wali suma jupanakpura utjasipxirïtayna. Jani q’iwsasisa, jani p'inqasisa, jaqi masinakaru sumana uñjasa.

Taqpacha imilla wawanaka, yuqalla wawanaka, akata qhiphana sumana utjasiña utjpana, sasa. Ukanaka jumanakaxa ancha amuyt’apxma, uka suma jakañaxa jichhakamasa janiwa atipt'atäkiti.

Ukaxa, kunaymana luratanakaxa janiwa jumanakatakikïti, janikucha ukaxa taqpacha aka pachankiri jaqinakatakiwa.

¡Jallalla Aymara marka!
¡Jallalla Awiya Yala!

(Qillqiri: Germán Maidana Murillo)

Foto: Junji.gob.cl

Uñaraña

Kamachixa markataki askïñapawa

(El Alto, 16.09.2013 09:18) Altu Pata markana, Carta Organica Municipal, uka Kamachi lurawiwa qalltani. Uka yatiwixa, janiwa taqi markachirinakaru, phuqhata yatiyatäkiti. Ukhama jani suma yatiyatawa pachpa markansa jani yaqätakiti.

Ukhmarusa, janirakiwa yatiskiti, kunjampinsa uka amtawxa sarantayapxani, uksa. Markachirinakaxa, ukhamäpanxa, janirakiwa kunärsasa, kawkhansa khitinakasa ukxa amuykipapxani, uksa. Ukata uka Kamachxa jani khitisa yäqapxkiti.

Jichhaxa Altu Pata markachirinakaru aka amtawi yatiyañaxa wakisiwa. Kuna matasa, kunata luratasa, kuna kamachi uñakipawisa, taqina amuki phuqhañataki, taqitaki askïñapatakixa, pachpa markawa yatiñapa.

Qillqiri: Norah Quispe (Al Alto - La Paz/Bolivia) 

Uñaraña

Liqi liqiwa janq'u k'awnxatayna

(11.09.2013 La Paz)

Jichha maraxa tata Lucas Choque jilatampiwa jikist’apxtha. Jupaxa wali llakitawa mä phutu uñacht’ayitu. Uka phuthunxa liqi liqina k’awnapa janq’uwa. Janipuniwa ukhama liqi liqixa k’awnirïkiti, siwa. ¿Mä ancha t’aqhisiña mach’a maranakati jutxpachäni? ¿Kuna pachanakasa jutaskpacha? Sasawa jupaxa wali muspata jiskht’asi.

Tata Lucas Choque jilataxa, mä wali yäqkaya Tiwanaku yatiriwa. Ukata nayatakixa, uka llakisitapaxa, chiqa wali muspaykiriwa. Liqi liqixa aymara markana amuyiri wali yäqata jamach’iwa. Ukata liqi liqixa ch’uxñpini k’awniri, janiwa naya akja maranakana janq’u k’awniri uñjirïkthti. Ukaxa janiwa ukhamakïkaspati, ¿kunsa liqi liqixa yatiyaña munaskapxpachïstu?

Jichha maraxa niyawa sata pasatxa liqi liqixa k’awnaña qalltani. Ukxa, taqichaqana, wali jiwasa kampuna sarnaqasirixa uñch’ukipxañasa, ukawa jilanakasaru yatiyasa amuyt’ayaña. Ukhamaraki laqa ukxa, markasaru yatiyanxapxañapa. Jani jiwaskama yatiyaskañänixa, ¿kunjamatsa markasaru amuyt’ayapxañäni?

Qillqiri: Félix Layme Pairumani (La Paz - Bolivia)

Uñaraña

Titiqaqa quta taypina jaqichasiwi

(Puno 26.08.2013 15:49) Aymara Ayllunakanxa llumpaqa paxsixa, yapunakatakixa, wali suyatarakiwa. Kunatixa, uka urunakanxa pachaxa junt’uchaña qalltaraki. Wayrampi chikaxa qiñayanakasa uksaru aksaru apanaqtarakiwa, qarpasa puriña qallantkarakiwa, urqisa phuthutiña qallantkarakiwa, ukata kuna quranakasa aywtankarakiwa.

Ukhamïpanwa, aymara yaqinakaxa kunaymana lurawinakwa phuqhapxtana: pachana sarawipsa arkayapxtana, nayrïri lumasanaka uñch’ukipxtana; PachMamaru luqtawinakampisa phuqhapxtana, yapuchañanaksa qalltapxkaraktana; ukhamaraki, jaqinakasa panichasiwinaka wakiyapxaraktanwa.  

Uka qamawi arkaykasaxa; Punu markanxa, pätunka pusini uru saraqkäna llumpaqa paxsitxa, wakiyasiwarakiwa maya jach’a Jaqichasiwi  -matrimonio Comunitario; ukaruxa pätunka chacha – warminaka purt’axarakina jaqicht’asiñataki; wayna taqunakasa utjakirakinawa ukhamaraki chuymanïrinakasa.  Uka jaqichasiwixa phuqhasiwarakiwa Titiqaqa quta mama taypina,  maya jach’a walsa patana, suma jiwallakipuninawa. Janipuniwa ukhama jaqichasiwixa uñjañakänati, jichhapuniwa ukhama wakicht’asiwixa; Punu marka irpirirakiwa – Alcalde, p’iqt’karakinaxa; panicht’asirikaxa wali k’uchi ukhamaraki kusisitawa jikxatasipxarakinaxa. Inaya jutiri maranakanxa ch’amañchatachini.

Taqi jaqicht’asiri jila kullakanakaxa jallallt’ataraki.

Qillqiri: María Yolanda Crisisto Aycaya (Puno-Perú)

Uñaraña

Desfile cívico militar en Potosí

Jichha maraxa Desfile Cívico Militar ukaxa  Potosí markana phuqhasiwayána. Ukaxa marchawixa khaya 2006 marana uñstawayäna. Sucre markana nayraqata uñstawayäna. Ukata sapa marawa llä tunka markanakana muyuña qalltawayi.

Ukaxa markasana markata amtasiñataki wali askiwa. Markasana sutipa, urupa wali amuyt’ayi ukhamaraki markasatsa chuyma wali ch’allxtayi. Ukanxa taqiniwa marchapxi: militaranaka, palla pallanaka, taqpacha jaqi markanaka (aymaranaka, ayuriyunaka, chikitanunaka, qhichhwanaka, waraninaka, warayunaka, ukhama markanakawa wali muspkaya marchawayapxi). Aka markanakana niya marchawayxapxi:

Aka marchañaxa akhamawa akata qhiphansa muyuskpachäni…
Sucre	2006	2015	2024	2033
Santa Cruz	2007	2016	2025	2034
Cochabamba	2008	2017	2026	2035
Oruro	2009	2018	2027	2036
Cobija	2010	2019	2028	2037
Tarija	2011	2020	2029	2038
Trinidad	2012	2021	2030	2039
Potosí	2013	2022	2031	2040
La Paz	2014	2023	2032	2041

Khitisa markasaa apnaqirita mantaskpa, uka markasata amtasiñaxa janipuniwa chhaqhañapäkiti. Uka marchata video ukanakasa phisqha marata phisqha marata mä video ukaru apsutawa aljasxañapa. Ukaxa markasaru marchañsa yatichani ukhamaraki markasata aliqa amtaskiri ch’amanchistani.

Ukata jiwasanaka ukhama munañänixa ukhamäniwa.

Uñaraña

Jilata Roberto Fernández Erquicia

Khä 1983 maranakana, Instituto Nacional de estudios Lingüísticos (INEL) ukana irnaqasipxayätha. Ukaru purt’asinkiri mä wiraxucha waynuchuxa, wali jiwaki parliri ukhamara wali jiwaki sawkasiri, ukhamänawa. Kunsa laruñjamaki parliri. Juparuxa tata Witaku Wankasa, Juwaniku Carvajalasa uñt’awayapxiwa. Qhipha maranakaxa, jupaxa jiwatjamawa chaqhawayxi. Janiwa sarxäwa, janiwa jutxkäti sawäpxkitusa, ukhamakiwa chhaqhawayxi. Nayaxa juparu phutu apsurïtha. Ukhamata jupana mä phutupaxa utjitu.

Jichha urunakaxa, khaya facebook uksatuqiwa, wasitata uñt’asxapxtha. Jupaxa París markana qaamaskatayna. Uksana mä murinu tamawa thuqhuntatayna, uka phutunaka apayanitu. Ukata nayaaxa juparu qillqtha: “mä yatiyawi uka markana murinu thuqhutapata qillqt’anirapita”, sasina.  Jupaxa wali q’aphapiniwa kastilla aruta qillqt’anisa apayanitu, ukxa jichhaxa aka Jayma yatiyawina uñxatt’aañamataki apst’asinkapxtha.

Jupjama jilanakasaxa, kawki markasata jayankkasasa, markasana ch’amanchasiñpataki qillqt’anixa, wali askipuniwa. Inacha mayni yaqha jilatanakaxa, Roberto juparu uñtasa qillqt’anipxistaspa, wali kusapunispawa. Jallalla jilata Roberto. Jumaxa aymara markana wawapäskaraktawa.

Uñaraña

Escuela de Gestión Pública, jach'a ulaqa

Escuela de Gestión Pública Plurinacional ukhamaraki Instituto Plurilingüe de Estudio de Lenguas y Culturas uka paya jach’a tantachawi irpirinakapaxa, purapata aymara ukhamaraki yaqha jiwasa jaqi arunakasaru ch’amanchañatakiwa mä convenio interinstitucional taypixa pasiri maraxa purapata mä aski amtaru puriwayapxana. Ukhamäpanxa, masuru 26 urukipanxa Chukiya markana   Programa de Capacitación en Idiomas Oficiales - EGPPukhamaraki Instituto de Lengua y Cultura de la Nación Aymara ILCNA ukana irnaqrinakaxa aruskipañatakiwa jikist’awayapxana. ILCNA irpa utasaxa jichhata uksaruxa  Roman Morales jupana p’iqinchataxiwa, ukhamarusa Martha Gonzales, Eva Apasa, Esteban Quispe, Freddy jupanakana yanapt’apampi irpxarutaxarakiwa.

Uka jikist’awinxa, Bolivia markasa utjiri aski kamachinakxata aruskipt’apxana, jichhata uksaruxa kuna lurañanakampisa Ley General de Derechos y Políticas Lingüísticas kamachi phuqhañatakixa nayraqataru sarantañani, taqi ukanakxata aruskipt’awayapxana. Ukxaruxa EGPP tantachawinkiri Programa de Capacitación en Idiomas Oficiales ukankirinakaxa kunjamsa aymara aru yaticht’añamapixa sarantaskapxi ukxata qhanancht’apxana, ukata aymara aru yatirinakaru yanapt’añatakisa kunjamsa ch’amanchaskapxi taqi ukanaka yatiyapxarakina. Escuela de Gestion Publica Plurinacional ukaxaIvan Iporre Saguero jilatana p’iqinchatawa, uka taypinxa  Programa de Capacitación en Idiomas Oficiales ukaxa Vitaliano Huanca Torrez jilatana ch’amanchatarakiwa.

Jutiri urunakatakixa ILCNA jach’a tantachawisaru taqi chuyma ch’amanchañatakixa, juk’ampi aski amtanaka wakicht’ayañatakiwa jutiri phaxsixa mayampi jikisipxani.  Uka aruskipañanxa juk’ampi amtanaka phuqhañatakiwa aymara aru ukhamaraki aymara markaru ch’amanchirinakaxa amtanaka phuqhacht’apxani.

LP 27/02/2014

Qillqiri: Vitaliano Huanca

Uñaraña